Үндэсний телевиз
Цагийн хүрд
Найм арваннэг
Монгол Улсын баялгийн сан нь тогтворжуулалт, хуримтлал, болзошгүй нөөцийн сан гэсэн үндсэн гурван төрөлд хуваагддаг байхаар тусгагдах талаар яригдсаар багагүй хугацаа өнгөрч байгаа.
Уг сангийн тухай хуулийн төслийг холбогдох албаныхан гадны орнуудын туршлагыг судалсны үндсэн дээр боловсруулан Ерөнхийлөгчийн Тамгын газраас санал авахаар хүргүүлээд байгаа аж.
Тэгвэл уг хуулийн төслийг боловсруулах явцад “Хүний хөгжил” сангийн нэршил, үйл ажиллагааны зорилтот чиглэлд өөрчлөлт оруулан, “Ирээдүй өв” сан байгуулах талаар яригдсан байна.
Манай улсын “Хүний хөгжил” сан нь ашигт малтмалын нөөц ашигласны төлбөр 70 хувь болон төрийн өмчит томоохон компаниудын ногдол ашгаар санхүүждэг. Тэгвэл уг баялгийг 2025 он гэхэд шавхагдаж эхэлнэ гэж тооцвол тус сангийн санхүүжилтэд хүндрэл учрах эрсдэл харагдаж байгаа юм.
Сүүлийн гурван жилийн дундаж үзүүлэлтээс харахад “Хүний хөгжил” санд жилдээ 500 орчим тэрбум төгрөг төвлөрдөг аж.
Тиймээс бодлого тодорхойлогчид уг мөнгийг “Ирээдүйн сан”-д шилжүүлэн төвлөрүүлж, олон улсын зах зээл дээр санхүүжилт хийх хэлбэрээр хүүг нь өсгөх талаар чиглэл барих нь зүйтэй гэж үзжээ.
Өөрөөр хэлбэл, “Ирээдүйн өв” сангийн мөнгийг тодорхой зорилтот хугацаанд нийгмийн халамж руу чиглүүлэхгүйгээр, 2015 оноос улсын төсөвт тусгах асуудлыг хуулийн төсөлд тусгасан байна.
Баялгийн сангийн тухай хуулийн төсөлд багтсан уг заалтууд дэмжлэг хүлээж чадвал, Монгол Улс цаашдаа “Ирээдүйн өв” сангаа менежментийн сайн баг бүхий корпорацид хариуцуулан, Сангийн яам болон төрийн зүгээс ямар нэгэн хэлбэрээр оролцохгүй, ил тод үйл ажиллагаатай байхаар төлөвлөжээ.
Ингэснээр баялгийн сангийн тухай хуулийн төслийн зарим заалтуудад нийцүүлэн, уг сангийн хууль мөн шинээр батлагдах шаардлага үүсэх юм.
| Хүний хөгжил санг “Ирээдүйн өв” болгох тухай ярьж байна | ||
| Үзсэн: 2008 | Mongolian National Broadcaster |
М.Золзаяа
Б.Цоожчулуунцэцэг
Р.Слава
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.